Óvíst hvort verkefnið klárist fyrir áramót
Setja bókamerki
Tengdar fréttir
Borgarlínan
Samninganefndir ríkisins og Samtaka sveitarfélaga á höfuðborgarsvæðinu (SSH) hafa fundað stíft að undanförnu vegna uppfærslu samgöngusáttamála höfuðborgarsvæðisins. Verkefnið átti að klárast í sumar en óvíst er hvort því ljúki fyrir áramót.
„Það er góður andi í þessu. Það er verið að fást við gríðarlega umfangsmikið og að mörgu leyti flókið verkefni. Það er líka mikilvægt að vanda vel til verka í svona uppfærslu,” segir Páll Björgvin Guðmundsson, framkvæmdastjóri SSH, og segir aðspurður að enginn beinn ágreiningur hafi verið uppi um nokkur mál.
Hann segir að minnisblaði SSH og innviðaráðuneytisins sé fylgt að langmestu leyti við vinnuna.
„Ég held að það sjái allir sem aka um höfuðborgarsvæðið hvað þörfin er brýn á að við náum utan um þetta sem fyrst,” bætir Páll Björgvin við.
Aukinn kostnaður töluverð áskorun
Samninganefndirnar hafa rætt um hvernig skynsamlegast er að koma verkefninu fyrir, á hve löngum tíma og hvernig framkvæmdirnar tengjast saman. Einnig er rætt hvernig stilla skal fjármögnunina af, að sögn Páls Björgvins.
Spurður hvort rætt hafi verið um að hætta við einhverjar framkvæmdir segir hann að árið 2019 hafi verið sátt á milli sveitarfélaga og ríkisins um að fara í ákveðnar framkvæmdir. Enn sé verið að fylgja eftir grundvallaratriðum sáttmálans þó svo að verið sé að uppfæra framkvæmdaáætlunina og fara yfir fjármögnunina.
„Við eigum eftir að sjá hver endanleg niðurstaða verður,” segir framkvæmdastjórinn og nefnir að áskorunin sé töluverð varðandi aukinn kostnað við sáttmálann frá upphaflegri áætlun.
Þrír þættir í fyrirrúmi
Páll Björgvin bendir á að íbúum höfuðborgarsvæðisins hafi fjölgað meira en áætlanir gerðu ráð fyrir og slíkt hafi mikil áhrif á umferðina. Allir geti séð það, sérstaklega á álagstímum.
„Markmiðið sem slíkt er að bjóða upp á þessa fjölbreyttu valkosti. Við erum ennþá að tala um að byggja upp stofnvegi á höfuðborgarsvæðinu, sérakreinar fyrir almenningssamgöngur og síðan hjóla- og göngustíga. Þetta eru þessir þrír þættir sem var gengið út frá í upphafi,” greinir hann frá.
„Ég er frekar jákvæður. Við vinnum stíft að þessu. Við ætluðum að vera búin að þessu í sumar en þetta hefur tekið lengri tíma. Það hefur ekkert skort viljann og það er búið að sitja vel við. Hvort við náum þessu fyrir eða eftir áramót verður að koma í ljós,” heldur hann áfram.
„Stórar upphæðir”
Regína Ásvaldsdóttir, formaður stjórnar SSH og bæjarstjóri Mosfellsbæjar, segir samtökin þrýsta á að verkefnið klárist sem allra fyrst.
„Þetta eru stórar upphæðir og framtíðarsýn sem skiptir okkur öll mjög miklu máli en við höfum góðar væntingar til þessarar vinnu,” segir Regína, spurð út í stöðu mála.
Tengdar fréttir
Borgarlínan
Áfram í haldi grunaður um manndráp
Bjarni: Of snemmt að ræða lagasetningu
Segir samtalið við kjósendur rétt að byrja
Vinna hafin við gerð nýs varnargarðs
Eðlilegt að fjör sé að færast í leikinn
Mannlegir þættir orsakavaldur flugslyssins á Þingvallavatni