Boeing fær skell á hlutabréfamarkaði
Setja bókamerki
Hlutabréf í bandaríska flugvélaframleiðandanum Boeing lækkuðu talsvert í dag eftir opnun markaða í Bandaríkjunum. Nam lækkunin fyrst um 9%, áður en þau fóru örlítið að færast upp á við á ný, en þegar þetta er skrifað nemur lækkun dagsins um 8%.
Lækkunina má rekja til atviks á föstudaginn þegar Boeing 737 Max 9 vél flugfélagsins Alaska Airlines þurfti að nauðlenda eftir að hleri í farþegarýminu gaf sig þegar vélin var nýlega komin í loftið þannig að opið var úr farþegarýminu og út. Lenti vélin fljótlega í kjölfarið og sakaði engan.
Bandarísk flugmálayfirvöld ákváðu eftir þetta atvik að kyrrsetja 171 Boeing 737 Max 9 vélar og kröfðust þau tafarlausar skoðunar á vélunum.
Fjárfestar virðast hafa tekið fréttum af þessu atviki alvarlega, en flugvélaframleiðandinn fór í gegnum nokkuð erfiða tíma í kjölfar tveggja mannskæðra flugslysa á 737 Max flugvélum árin 2018 og 2019.
Dow Jones-hlutabréfavísitalan í Bandaríkjunum lækkaði um 0,4% í fyrstu viðskiptum dagsins og var það að stórum hluta rekið til lækkunar Boeing.
Hlutabréf í nokkrum flugfélögum hafa einnig lækkað í dag. Þannig hafa bréf Spirit lækkað um 15% og í Alaska Airlines um 4,2%.
Icelandair notast við Boeing 737 Max 9 vélar, en ekki þótti ástæða til að kyrrsetja þær. Tengist atvikið ekki búnaði sem er til staðar í vélum flugfélagsins.
Þurfa að taka myndir áður en goslokum er lýst yfir
Merkilegt hve lengi gosið hélt dampi
Hvernig er vitað að þessi kona átti þetta barn?
Fylgi Höllu hrundi eftir kappræðurnar
Eldgosinu lokið en getum búist við öðru
Goslok hafa ekki áhrif á vinnuna
Sleppt úr varðhaldi: Búið að klippa kanta á seðlum
Eldgosinu er lokið
