Íslandsbanki ákvað að taka tilboðum að andvirði um 1,2 milljarða króna við endurkaup á eigin bréfum með öfugu tilboðsfyrirkomulagi sem lauk í gær. Bankinn tók tilboðum fyrir um 11,8 milljónir hluta á genginu 99,8 krónur á hlut.
Endurkaupin eru hluti af endurkaupaáætlun bankans. Rétt er að hafa í huga að bankinn hafði þó gert ráð fyrir að kaupa mun meira í þessari umferð, eða fyrir um þrjá milljarða króna.
Ellert Hlöðversson, fjármálastjóri Íslandsbanka, segir í samtali við ViðskiptaMoggann að þetta sé í samræmi við áherslu bankans á að straumlínulaga efnahag hans fyrir lok árs 2025, m.a. með endurkaupum á bréfum.
„Við munum á komandi mánuðum halda áfram og bankinn getur notað til þess áframhaldandi endurkaup með endurkaupaáætlun, endurkaup með útboðsfyrirkomulagi eða sértækar arðgreiðslur, eftir efnum og aðstæðum hverju sinni,“ segir Ellert.