Díana Dögg Magnúsdóttir, landsliðskona í handknattleik, hefur samið við þýska félagið Blomberg-Lippe um að leika með liðinu næstu tvö ár.
Díana Dögg gengur í raðir Blomberg-Lippe að yfirstandandi tímabili loknu með Sachsen Zwickau, þar sem hún hefur leikið undanfarin fjögur ár.
Blomberg-Lippe er í fimmta sæti þýsku 1. deildarinnar og hefur verið að berjast við toppinn undanfarin ár á meðan Zwickau er í 11. sæti og hefur verið að berjast við botninn undanfarin ár.
Því er ljóst að Díana Dögg tekur skref upp á við með félagaskiptunum.
Hún er 26 ára hægri skytta sem hefur verið fyrirliði Zwickau á undanförnum árum.