Viðskipti | mbl | 2.12.2023 | 0:55 | Uppfært 3.12.2023 10:05

Um fjórföld eftirspurn í útboði Ísfélagsins

Uppsjávarskipin Sigurður VE-15 og Heimaey VE-1, sem bæði eru í eigu Ísfélagsins, við bryggju á Þórshöfn. mbl.is/Líney Sigurðardóttir

Alls bárust um 6.500 áskriftir að andvirði um 58 milljarða króna í hlutafjárútboði Ísfélagsins sem lauk fyrr í dag, föstudag. Það samsvarar um fjórfaldri eftirspurn, þar sem til stóð að selja hluti að andvirði um 16 milljarða króna í útboðinu.

Í tilkynningu til fjárfesta á vef Ísfélagsins kemur fram að rúmlega fimmföld eftirspurn var eftir þeim hlutum sem boðnir voru í áskriftarbók A og rúmlega þreföld eftirspurn var eftir hlutum sem boðnir voru í áskriftarbók B. Heildarfjöldi seldra hluta í útboðinu nam um 118,9 milljón hlutum og heildarsöluandvirði útboðsins nam tæplega 18 milljörðum króna.

Frétt af mbl.is

Selja 14,5% í Ísfélaginu

Í áskriftarbók A er útboðsgengi 135 kr. á hlut og nemur söluandvirðið um 3,2 milljörðum króna. Áskriftir starfsmanna félagsins og almennar áskriftir upp að 500 þúsund krónum að kaupverði voru ekki skertar, sem er í samræmi við skilmála útboðsins. Skerðing áskrifta var að öðru leyti hlutfallsleg.

Í áskriftarbók B, sem ætluð er fagfjárfestum, er endanlegt útboðsgengi 155 kr. á hlut og nemur söluandvirðið um 14,8 milljörðum króna. Skerðing áskrifta var í samræmi við skilmála útboðsins og í tilkynningunni kemur fram að fjárfestar sem tilgreindu lægra útboðsgengi fengu ekki úthlutun.

Frétt af mbl.is

Ísfélagið siglir á markað í desember

Fjárfestum verður tilkynnt um úthlutun í útboðinu eigi síðar en á mánudag, 4. desember. Gjalddagi áskriftarloforða er 6. desember næstkomandi og er ráðgert að afhending hinna nýju hluta til fjárfesta fari fram þann 8. desember. Bréf félagsins verða tekin til viðskipta á Aðalmarkaði Kauphallarinnar sama dag.

Einar Siguðsson, varaformaður stjórnar Ísfélagsins, og Stefán Friðriksson forstjóri. Árni Sæberg

„Við erum hæstánægð með mjög góðar viðtökur í útboði Ísfélagsins sem endurspegla trú fjárfesta á bæði félagið og sjávarútveginn. Við bjóðum fjölbreyttan hóp hluthafa velkominn,“ segir Stefán Friðriksson, forstjóri Ísfélagsins, í tilkynningunni.