Kvika banki og TM hafa sent frá sér yfirlýsingar þar sem því er hafnað, sem fram kom í Fréttablaðinu í dag, að viðræður séu í gangi um mögulegan samruna TM og Kviku. Í yfirlýsingunum segir ennfremur að slíkar viðræður séu ekki fyrirhugaðar.
Á forsíðu Fréttablaðsins í dag, er því haldið fram að æðstu stjórnendur Kviku banka og TM hafi undanfarnar vikur átt í viðræðum um mögulega sameiningu félaganna. Segir í fréttinni, að rætt hafi verið um helstu skilmála slíkra viðskipta. Tekið var fram að viðræðurnar væru nú á ís.
Bæði TM og Kvika hafa sent frá sér yfirlýsingar vegna málsins þar sem þessu er neitað.
„Vegna fréttaflutnings þar að lútandi vill TM árétta að engar viðræður eru í gangi um mögulegan samruna TM og Kviku, né eru slíkar viðræður fyrirhugaðar,“ segir í tilkynningu TM til Kauphallarinnar.
„Í morgun voru birtar fréttir um mögulegan samruna Kviku og TM. Engar viðræður eru í gangi og ekki eru fyrirhugaðar viðræður um samruna félaganna,“ segir í tilkynningu Kviku til Kauphallarinnar.