Holland tryggði sér fimmta sætið á HM 2023 í handknattleik kvenna með því að vinna þægilegan sigur á Þýskalandi, 30:26, í Herning í dag. Í morgun tryggði Svartfjallaland sér sjöunda sætið með sigri á Tékklandi.
Í leik Hollands og Þýskalands lögðu Hollendingar grunninn að sigrinum með magnaðri frammistöðu í fyrri hálfleik.
Staðan í hálfleik var 16:7 og ljóst að róðurinn yrði þungur fyrir Þjóðverja í síðari hálfleik.
Þrátt fyrir að leika töluvert betur í síðari hálfleik komst Þýskaland ekki nær Hollandi en fjórum mörkum á lokasekúndunum og sigur Hollendinga því aldrei í hættu.
Angela Malestein var markahæst hjá Hollandi með sjö mörk.
Hjá Þýskalandi skoraði Antje Döll einnig sjö mörk og Alina Grijseels bætti við sex mörkum.
Meiri spenna var í leiknum um sjöunda sætið þó Svartfjallaland hafi byrjað leikinn gegn Tékklandi mun betur.
Eftir að hafa komist í 6:1 og 7:2 tóku Tékkar sig til og jöfnuðu metin í 7:7.
Svartfellingar náðu aftur undirtökunum og leiddu með fjórum mörkum, 14:10, í hálfleik.
Í síðari hálfleik reyndu Tékkar hvað þeir gátu til þess að koma sér betur inn í leikinn en komust hins vegar ekki nær en fjórum mörkum og sjöunda sætið kom í hlut Svartfellinga.
Itana Grbic var markahæst í leiknum með sjö mörk fyrir Svartfjallaland.
Marketa Jerábková, Adéla Strísková og Marketa Sustácková voru markahæstar hjá Tékklandi með fimm mörk hver.