Knattspyrnumaðurinn Naby Keita spilar ekki meira með þýska 1. deildarfélaginu Werder Bremen á tímabilinu.
Þetta tilkynnti Clemens Fritz, yfirmaður knattspyrnumála hjá félaginu, á blaðamannafundi í vikunni.
Keita, sem er 29 ára gamall, neitaði að ferðast með þýska liðinu í síðasta útileik gegn Bayer Leverkusen á sunnudaginn eftir að hann komst að því að hann yrði á bekknum í leiknum.
Fritz greindi frá því á sunnudaginn að Keita yrði refsað fyrir uppátækið og hann tilkynnti svo í dag að hann myndi ekki leika meira með liðinu á tímabilinu.
Keita gekk til liðs við Werder Bremen sumarið 2023 eftir að samningur hans við Liverpool rann út en hann lék með enska félaginu frá 2018 til 2023.