„Ég horfi á þetta mót sem vonbrigði,“ sagði Snorri Steinn Guðjónsson, þjálfari íslenska karlalandsliðsins í handknattleik, í Fyrsta sætinu.
Snorri Steinn, sem er 42 ára gamall, stýrði íslenska liðinu í fyrsta sinn á stórmóti á Evrópumótinu í Þýskalandi sem lauk á dögunum en Ísland hafnaði í 10. sæti á mótinu.
Yfirlýst markmið íslenska liðsins fyrir Evrópumótið var að tryggja sér sæti í undankeppni Ólympíuleikanna 2024 sem fram fara í París í sumar en það tókst ekki.
„,Við náðum ekki markmiðum okkar og spilamennskan var ekki nægilega góð,“ sagði Snorri Steinn.
„Þetta var of kaflaskipt og við getum farið í fullt af hlutum þar sem vantaði mikið upp á. Að komast svo ekki í undankeppni Ólympíuleikanna voru mikil vonbrigði,“ sagði Snorri Steinn meðal annars.