Smartland Mörtu Maríu | Tíska | mbl | 11.2.2024 | 16:00

Dýrt rakakrem ekkert betra en ódýrt

„Rakakrem er bara rakakrem. Það er hægt að kaupa rakakrem sem kostar ekkert nánast og svo einhver svona rándýr merki en það eru nánast sömu innihaldsefni í þeim,“ segir Ragna Hlín Þorleifsdóttir sem ræddi ásamt Katrínu Mjöll Halldórsdóttur, barnasálfræðingi, um áhrif aukins húð- og snyrtivöruáhuga á líkamlega og andlega heilsu í Dagmálum.

Útlitsdýrkun ungra stúlkna sívaxandi vandamál

Ragna Hlín starfar sem húðlæknir á Húðlæknastöðinni á Smáratorgi og segir hún fulla ástæðu til að fagna aukinni vitundarvakningu almennings á húðumhirðu. Enda feli það margt jákvætt í sér fyrir almennt heilbrigði fólks.

„Svo kemur kannski fólk til mín með poka fullan af vörum og spyr hvort þetta séu góðar vörur og eitthvað svona. En merkið kannski skiptir ekkert endilega máli,“ lýsir hún en daglega segist Ragna Hlín fá spurningar frá skjólstæðingum sínum um hentugar húðvörur og þykir henni jákvætt að fólk falist eftir ráðleggingum fagfólks og noti viðeigandi húðvörur gæddar réttum innihaldsefnum.

Frétt af mbl.is

Barnungar stúlkur hafa áhyggjur af svitaholum

Verð og vörumerki skipta ekki máli

„Það er gott að vita að það eru ákveðin innihaldsefni sem geta hjálpað þér. Það fer náttúrulega eftir því hvernig húðtýpu þú ert með, hvort þú sért með eitthvað vandamál eða ekki vandamál, þannig þú leitar kannski eftir einhverju sem getur hjálpað þér,“ segir hún og þylur upp:

„Retinól ef þú ert að hugsa um einhverjar hrukkur eða til að byggja upp kollagen í húðinni, eða sýrur ef þig vantar einhvern smá gljáa, og svo eru það sólarvarnir.“

Að mati húðlækna er aldrei of oft kveðið á um mikilvægi sólarvarnar. Þar að auki segir Ragna Hlín að sólarvörnin sé besta fyrirbyggjandi lausnin við ótímabærri öldrun og skaðsemi á húð.

„Hvort þú kaupir eitthvað sem kostar 15.000 eða eitthvað sem kostar 5.000 það skiptir ekki máli bara ef þú veist að þarna eru innihaldsefnin og henta þér.“