Í einu af betri hverfum höfuðborgarinnar býr fjölskylda í huggulegu 300 fm einbýli. Fjölskyldan endurnýjaði húsið mikið fyrir nokkrum árum og klæðskerasneið húsið að þörfum fjölskyldunnar. Þau fengu arkitektinn Björgvin Snæbjörnsson til liðs við sig. Hann hannaði innviði hússins eins og innréttingar og svo breytti hann skipulagi þess. Hann færði eldhúsið í hinn endann til að það nyti sín sem best.

Húsmóðirin segir að Björgvin hafi hugsað út í öll smáatriði og þau hafi verið mjög ánægð með hans störf. Eldhúsið kemur reyndar frá Þýskalandi og frá merkinu Sie Matic en allar aðrar innréttingar voru sérsmíðar hjá Hegg.

Á gólfunum er gegnheilt eikarparket en flísarnar eru úr svörtu graníti.

Baðherbergin eru sérlega glæsileg. Á veggjunum og á gólfi er sandsteinn og spilar hann fallega á móti granítinu. Húsgögnin koma héðan og þaðan. Verslunin Gegnum glerið er í uppáhaldi og koma sófarnir í stofunni þaðan.