Nýtt þrívíddarlíkan af gossvæðinu við Sundhnúkagíga hefur verið birt. Þar sést vel umfang hraunsins sem hefur runnið úr eldgosinu.
Líkanið var unnið af myndmælingateymi Náttúrufræðistofnunar Íslands og Landmælinga Íslands, í samstarfi við almannavarnir og Háskóla Íslands, að því er segir á facebooksíðu Náttúrufræðistofnunar.
Myndirnar sem líkanið er unnið eftir voru teknar úr flugvél upp úr kl. 13 á mánudaginn.
Flatarmál hraunbreiðunnar mælist 6,14 ferkílómetrar. Eldgosið er því orðið víðfeðmara en fyrri gosin sex á Reykjanesskaga.
Virknin í eldgosinu virðist vera mun minni en á sama tíma í gær. Þetta segir Bjarki Kaldalóns Friis, náttúruvársérfræðingur hjá Veðurstofu Íslands, spurður út í stöðu mála í morgun.
Hann segir að það eigi þó eftir að koma betur í ljós hvort dregið hafi úr virkninni.
Hraunið úr gosinu rennur suður og fer ekki langt. Landris er enn í gangi en lítil skjálftavirkni hefur verið við kvikuganginn undir Svartsengi.