Kolbrún Áslaugar Baldursdóttir, borgarfulltrúi Flokks fólksins, spurði í umræðu um nýja byggð í Keldnalandi hvort uppbygging hennar sé algjörlega háð uppbyggingu borgarlínu en borgarlínan er samofin vinningstillögu í alþjóðlegri samkeppni um þróun Keldnalands.
Dagur B. Eggertsson borgarstjóri svaraði því afdráttarlaust til að frestun borgarlínu myndi fresta uppbyggingu Keldnalands. Nokkrir borgarfulltrúar tóku til máls og sögðu að fólk mætti ekki lesa of mikið í orð þingmanna og ráðherra þannig að uppbygging borgarlínu muni frestast um langan tíma.
Hjálmar Sveinsson, borgarfulltrúi Samfylkingar, komst ágætlega að orði í þeirri ef og hefði umræðu sem átti sér stað á fundinum.
„Þessi umræða er oft svolítið skemmtilegt hérna og mér dettur í hug orðatiltækið: Ef og sé og mundi – átján rófur á einum hundi. Það gæti náttúrulega margt gerst einhvern veginn öðruvísi en ég held að það sé engin ástæða til þess að efast um það að borgarlínan fer í gagnið.
Ég held að þetta séu svona yfirborðsgárur sem við höfum séð í fjölmiðlum og á samfélagsmiðlum. Ég hef engar áhyggjur af því.“
[Innskot blaðamanns: Hjálmar fór ekki alveg með rétt mál en vísan er svohljóðandi: „Efa og sé og efa og mundi – átján rófur á einum hundi“]
Hvort borgarlína frestist um skemmri eða lengri tíma verður að koma í ljós en ef marka má orð borgarstjóra stendur og fellur vinningstillagan um uppbyggingu þess með uppbyggingu borgarlínu.