Margrét lætur af formennsku

Margrét Sanders, formaður Samtaka verslunar og þjónustu, mun ekki gefa kost á sér til áframhaldandi setu sem formaður samtakanna. 

Þetta kemur fram í tilkynningu en Margrét hefur verið formaður SVÞ síðan 2014.

Fram kemur að margt hafi áunnist á þeim tíma. Þar beri hæst niðurfelling tolla og vörugjalda á árunum 2015-2017.

„Margrét hefur sett menntun í atvinnulífinu í forgang og er afrakstur þess meðal annars ný og spennandi námsbraut til stúdentsprófs sem hefst í Verslunarskóla Ísland í haust,“ segir í tilkynningunni.

„Í störfum sínum hjá SVÞ hefur Margrét unnið ötullega að því að bæta rekstrarskilyrði einkareksturs í heilbrigðisþjónustu og skólamálum auk þess að víkka út starfsemi þjónustugeirans og tala fyrir auknum útboðum verkefna hjá hinu opinbera til einkaaðila.

Innan SVÞ og Samtaka atvinnulífsins hefur Margrét lagt mikla áherslu á að nútímavæða vinnumarkaðinn og auka sveigjanleika vinnutíma til hagsbóta fyrir starfsfólk og atvinnurekendur.“

Margrét mun láta af formennsku á aðalfundi SVÞ 14. mars.

• Blogga um frétt