Stórar breytingar í Eurovision-hópnum
Setja bókamerki
Fjölmiðlamaðurinn Gísli Marteinn Baldursson greindi frá því í gær að hann ætlaði ekki að taka að sér að lýsa Söngvakeppni evrópskra sjónvarpsstöðva í ár. Stórar breytingar verða því á hópnum þar sem Felix Bergsson fer heldur ekki út eins og undanfarin ár.
Rúnar Freyr Gíslason, verkefnastjóri hjá RÚV, sagði að ekki væri komið í ljós hver yrði þulur í ár þegar mbl.is leitaði svara.
„Ástæðan er framganga Ísraels á Gaza og viðbrögð keppninnar við henni, aðallega skortur á þeim,“ skrifaði Gísli Marteinn á Instagram í gær, mánudag, þegar hann greindi frá ákvörðun sinni.
Rúnar Freyr kemur í staðinn fyrir Felix
Felix Bergsson er í leyfi frá störfum á RÚV þar sem eiginmaður hans Baldur Þórhallsson er í framboði til forseta. Felix hefur verið fararstjóri íslenska hópsins undanfarin ár. Rúnar Freyr kemur í stað hans og verður fararstjóri í ár.
Ásdís María hætti líka við
Gísli Marteinn og Felix hafa ólíkar ástæður fyrir því að hafa hætt við Svíþjóðarförina. Tónlistarkonan Ásdís María Viðarsdóttir, einn lagahöfunda Scared of Heights, er enn annar aðilinn sem fer ekki til Malmö í maí.
Ásdís tilkynnti fljótlega eftir sigurinn í Söngvakeppninni að hún ætlaði ekki að fylgja laginu eftir eins og tíðkast meðal lagahöfunda. Sagði hún að þær athugasemdir sem gerðar voru við atkvæðagreiðsluna í Söngvakeppninni ættu rétt á sér en mjótt var á munum milli Scared of Heights og lags í flutningi Bashar Murad, Wild West. „En ég mun ekki fylgja laginu út í lokakeppnina ef af því verður. Samviska mín leyfir það bara ekki,“ sagði Ásdís í byrjun mars.
Hera Björk heldur til Malmö þrátt fyrir mótvind
Hera Björk Þórhallsdóttir fór með sigur af hólmi. Hera Björk var gestur Dagmála á Morgunblaðinu nýlega og sagðist hún aldrei hafa efast um að fara um lagið út ef hún myndi standa uppi sem sigurvegari. Hún varð ástfangin við fyrstu hlustun og ákvörðunin um að fara út til Malmö og keppa fyrir hönd Íslands var því auðveld.
„Það fylgdi því engin efi því lagið náði mér strax, eins og í hin skiptin á undan þegar ég fékk Someday í fangið, þegar ég og Öggi sátum yfir Je ne sais quoi og það var bara já þetta er það! Þetta er komið! Nú er það lent!“ sagði Hera í þættinum.
„Þakklátur að hanga í toppsætunum“
Verið að búa til „óánægju og kergju“
Óásættanlegt hversu langan tíma viðræður hafa tekið
„Eigum eftir að sjá miklar sviptingar“
„Finn fyrir miklum meðbyr“
11 verða í framboði til embættis forseta Íslands
Umdeild einkennismerki lögreglunnar