Innlent | mbl | 29.4.2024 | 11:43 | Uppfært 12:12

„Eigum eftir að sjá miklar sviptingar“

Fylgi Katrínar Jakobsdóttur í könnun Prósents er nú 18% en var 24% í síðustu viku. mbl.is/Arnþór Birkisson

Katrín Jakobsdóttir, fyrrverandi forsætisráðherra, segist vera pollróleg yfir nýjustu skoðanakönnun Prósents fyrir Morgunblaðið en í henni mælist fylgi hennar nú 18% en var 24% í liðinni viku.

Katrín er þar með fallin niður í þriðja sætið í baráttunni um forsetaembættið en fyrir ofan hana eru Baldur Þórhallsson og Halla Hrund Logadóttir, sem trónir í toppsætinu.

„Ég var nú búin að spá því að það yrðu miklar sviptingar fram undan í fylgi og ég held að það eigi áfram eftir að vera þannig,“ segir Katrín í samtali við mbl.is.

Halla Hrund tekur forystu í könnun

Katrín var stödd á veginum um Öxi þegar mbl.is náði tali af henni en hún eins og aðrir frambjóðendur eru á fleygiferð um landið að kynna sín framboð.

Eins og áður segir hefur fylgi Katrínar fallið um sex prósent frá síðustu könnun Prósents. Katrín segir að það komi sér ekki á óvart að fylgið sé á töluverðri hreyfingu.

Er alveg pollróleg

„Það er langt í kosningar og ég held að við eigum eftir að sjá miklar sviptingar í fylgismælingum. Ég er alveg pollróleg yfir þessu.“

Hefur þú einhverja einhlíta skýringu hvers vegna fylgi þitt sé á niðurleið miðað við þessa könnun?

„Nei. Ég held að við séum á upphafsmetrum þessarar baráttu og það eiga eftir að koma ansi margar kannanir sem verða mismunandi,“ segir Katrín.

Forsetaframbjóðendur í landsbyggðartúr

Hún reiknar með að baráttan um Bessastaði verði hörð allt til loka en kosið verður til embættis forseta Íslands þann 1. júní. Í könnun Prósents var einnig spurt hvaða frambjóðanda fólk teldi líklegastan til þess að fá flest atkvæði í forsetakjörinu. Katrín hefur þar afgerandi forystu, en 35,3% töldu hana sigurstranglegasta. Næstur kom Baldur Þórhallsson með 29,5%.

Renndi blint í sjóinn

„Þetta verður spennandi allt til loka. Þegar ég fór út í þessa baráttu lét ég ekki kanna landslagið og ég renndi þannig blint í sjóinn. Ég hef skilning á því að fólk hafi alls konar skoðanir á mér en ég hef líka trú á því mín barátta eigi eftir að skila sér. Mér finnst ég vera að fá gríðarlega góðar móttökur hvar sem ég er.“