Ásdís Rán Gunnarsdóttir, fyrirsæta og athafnakona, er ein af þeim 70 sem sækjast eftir forsetastólnum. Hún tilkynnti um framboð sitt til forseta þann 20. mars síðastliðinn og virðist harðákveðin í að ná tilskyldum meðmælafjölda, en frambjóðendur til forseta þurfa að safna að lágmarki 1.500 undirskriftum.
Ísdrottningin, sem er með tæplega 35.000 fylgjendur á Instagram, hefur nú uppfært samfélagsmiðlasíðuna og titlar sig í dag sem forsetaframbjóðanda, íslenska goðsögn og opinbera persónu.
Undirbúningur er kominn á fullt hjá Ásdísi Rán. Hún hefur verið iðin við að birta framboðstengdar færslur á Instagram-síðu sinni þar sem hún hvetur landsmenn að styðja við framboð sitt.
Sjálftitluð „Ungfrú Bessastaðir“ er einnig á fullu að æfa hina svokölluðu forsetapósu, krosslagðar hendur og blákalt augnaráð.