Joe Exotic, sem jafnan er þekktur undir heitinu Tiger King, segir að Donald Trump, fyrrverandi forseti Bandaríkjanna, hafi brugðist þegar hann sleppti því að náða sig. Raunveruleikastjarnan kveðst geta getið sér til um ástæðuna þar að baki.
„Það er vegna þess að ég er of saklaus og of hommalegur,“ var haft eftir Joe Exotic. Dýragarðseigandinn fyrrverandi var sagður svo sannfærður um að honum yrði veitt sakaruppgjöf að vinahópur hans ku hafa lagt eðalvagni skammt frá fangelsinu. Bifreiðinni var aftur á móti ekið á brott þegar niðurstaðan lá fyrir.
Exotic er að afplána 22 ára dóm í Fort Worth í Texas efir að hafa verið dæmdur árið 2019, meðal annars fyrir að hafa ráðið mann til að drepa andstæðing hans Carole Baskin. Sjálfur segir Exotic að Trump hafi í stað hans náðað „spillta“ vini forsetans fyrrverandi.