Albert Guðmundsson reyndist hetja varaliðs PSV í kvöld þegar hann skoraði 15. mark sitt á tímabilinu og tryggði liðinu 2:2-jafntefli á útivelli gegn Maastricht í hollensku B-deildinni í knattspyrnu.
Maastricht var 1:0 yfir í hálfleik en PSV jafnaði metin með skalla eftir aukaspyrnu Alberts. Heimaliðið komst svo í 2:1, en þremur mínútum fyrir leikslok jafnaði Albert metin fyrir PSV og þar við sat, lokatölur 2:2.
PSV er í fjórða sæti deildarinnar með 63 stig og ætti samkvæmt því að fara í umspil um sæti í efstu deild, en samkvæmt reglum deildarinnar getur varalið félags sem er í efstu deild ekki komist upp.