Knattspyrnumaðurinn Kristinn Freyr Sigurðsson er genginn til liðs við Val.
Þetta tilkynnti félagið á heimasíðu sinni í dag en Kristinn, sem er þrítugur, kemur til félagsins frá FH þar sem hann lék á síðustu leiktíð.
Þetta er í þriðja sinn sem leikmaður gengur til liðs við Val en hann kom fyrst til félagsins frá Fjölni árið 2012, hann snéri svo heim úr atvinnumennsku árið 2018 eftir eitt tímabil í herbúðum Sundsvall og samdi aftur við Val.
Kristinn varð Íslandsmeistari með liðinu árin 2018 og 2020 og bikarmeistari 2015 og 2016. Alls á hann að baki 218 leiki í efstu deild þar sem hann hefur skorað 42 mörk og þá á hann að baki einn A-landsleik.
„Hver annar en Kristinn Freyr Sigurðsson er mættur aftur á Hlíðarenda,“ segir meðal annars í tilkynningu Valsmanna.