Fylkir og Þróttur úr Reykjavík skildu jöfn, 1:1, í Lengjubikar karla í fótbolta í Egilshöllinni í dag. Þróttur komst yfir í fyrri hálfleik en Fylkir jafnaði leikinn í seinni hálfleik.
Daði Ólafsson skoraði sjálfsmark á 20. mínútu og kom Þrótti yfir og var staðan í hálfleik 1:0 fyrir 1. deildarliðinu.
Fylkismenn jöfnuðu hins vegar metin á 72. mínútu þegar Hákon Ingi Jónsson kom boltanum í netið og þar við sat. Bæði lið eru því með eitt stig í 2. riðli.
KR og Njarðvík eru í toppsæti riðilsins með þrjú stig og þar á eftir koma Fylkir og Þróttur. ÍBV og Víkingur Ó. eru án stiga.