Býst við að verði eins og á lestarstöð

„Þessi sýning er sú fyrsta sem haldin hefur verið í fjölda ára og er hugsuð fyrir áhugafólk um veiði og hnýtingar sem eiga að geta séð, upplifað og notið nærveru áhugaverða hnýtara, sýnenda, hlustað á fyrirlestra og tekið þátt í hinum ýmsu uppákomum.

Hér er smá getraun. Hvað þekkirðu marga með nafni á þessari mynd? Hér er saman komin mikil veiðireynsla hvort sem lítur að verslun eða stórlaxaveiði. Ljósmynd/Haugur

Markmiðið okkar er að vera með metnaðarfulla sýningu sem tekur á flestum þáttum veiðinar og er gert ráð fyrir fjölda gesta á sýninguna sem á að vera upphafið á vertíðinni," segir Sigurður Héðinn stoltur. Hann spyr því næst hvort hann megi telja upp þátttakendur.

Bara endilega. Gjörðu svo vel.

„Vona að ég gleymi engum en þeir eru: Veiðihornið, Veiðiflugur, Flugubúllan, Veiðiportið og Veiðifélagið. Fly Fish Europe, Guideline og fulltrúar frá Loop og Vision verða á svæðinu. Kormákur og Skjöldur verða með sína línu. Friggi, Reiða Öndin og Haugur verða þarna líka. Six River Iceland verða þarna og kynna það sem þeir eru að gera. Einnig verður sýndur verður INEOS Grenadier jeppinn sem er geggjaður veiðibíll, Veiðiportið er með bát á svæðinu. Á sýningunni verður fjöldi veiðileyfissala. NASF verður og bíður uppá að gestir geta fengið sér tattú og rennur allur ágóðinn til þeirra.“

Friggi Baldursson er búinn að koma sér fyrir. Baldur Hermannsson mun kynna gamla og nýja Frigga. Ljósmynd/Haugur

Þeir sem eiga SIMMS Gore-tex vöðlur geta nýtt tækifærið ef þeir þurfa að láta gera við. Fly Fish Europe sem er umboðsaðili SIMMS er með fimm manna teymi á sýningunni sem tekur við vöðlum til viðgerðar. Auðvitað þurfa þær að vera hreinar, merktar og SIMMS. 

Búast má við góðum tilboðum á sýningunni á alls konar, hvort sem eru stangir, vöðlur eða hvaða græjur sem er. Þá er rétt að hafa í huga að Silli kokkur mætir með vagninn sinn (veitingastaðinn) og mun selja sinn margverðlaunaða skyndimat.

Kaffi Haugur verður sett upp og þeir sem þurfa sterkara geta komist í það eftir klukkan 15. Haugurinn er nefnilega búinn að hugsa fyrir öllu. 

Það verða tilboð í gangi á mörgum básum. Jafnvel líka veiðileyfi með afslætti. En það kemur í ljós. Ljósmynd/Haugur

Átján fluguhnýtarar verða á sýningunni og munu sýna og kynna hvað þeir eru að gera.

Sýningin stendur bæði laugardag og sunnudag og opnar klukkan 10 báða daga og er opin til klukkan 18 á morgun laugardag en til klukkan 17 á sunnudag. Miða er hægt að kaupa á stubb.is en einnig verður posi við innganginn.

Flugur og veiði, eða The Icelandic Fly Fishing Show er tileinkuð minningu Jimmy Sjöland, fósturpabba Sigga Héðins sem lést fyrsta dag aprílmánaðar.