Þremur vikum eftir að Brynhildur Guðjónsdóttir tók við starfi borgarleikhússtjóra var starfsemi leikhússins nánast í lamasessi vegna heimsfaraldurs og samkomutakmarkana sem honum fylgdu. Brynhildur er því búin að vera í krísustjórnun nánast alveg síðan hún tók við en nú horfir til betri vegar og eru metnaðarfull verk á dagskrá leikhússins næsta haust.
„Það að vera í fimmtán mánuði í hamfarastjórnun í leikhúsi sem þrífst og lifir á því að taka á móti gestum, þetta bara breytir algjörlega hugsuninni hjá manni,“ segir Brynhildur, sem er nýjasti gestur Dagmála.
Hún nefnir t.a.m. að sama dag og nýr bar var opnaður í leikhúsinu hafi verið bannað að selja áfengi. Opnun barsins fór því fyrir lítið.
„Ef við lítum á Borgarleikhúsið sem risastórt skip sem sigldi hraðbyri í góðu veðri þá erum við núna búin að vera í stormi og þurftum bara að fara í var. 80% af orkunni er búið að fara í að passa að það komi ekki gat á skrokkinn og flæði inn vatn,“ segir Brynhildur.
Spennandi leikár er í burðarliðnum og er m.a. sýningin Níu líf, sem fjallar um líf Bubba Morthens tónlistarmanns á dagskrá. Hún var frumsýnd á leikárinu 2019 til 2020.
„Ég leyfi mér að fullyrða það að aldrei í næstum 125 ára sögu Leikfélags Reykjavíkur hafi stóra sýningin, sem er Níu líf, saga Bubba Morthens, Þurft að bíða heilt leikár.“
Þættir Dagmála eru opnir áskrifendum Morgunblaðsins og má horfa á viðtalið við Brynhildi Guðjónsdóttur í heild sinni hér. Mögulegt er að kaupa vikupassa hér.