Maðurinn sem slasaðist í vinnuslysi skammt frá Hrólfsstaðahelli og Leirubakka á Suðurlandi á laugardag er ekki í lífshættu. Ljósleiðarakefli féll á manninn með þeim afleiðingum að hann lærbrotnaði.
Lögreglan á Suðurlandi segir að slysið hafi átt sér stað þegar vinnumenn voru að leggja ljósleiðara á svæðinu. Mennirnir voru að lyfta kefli með ljósleiðaranum á í þar til gerðu tæki þegar bönd sem keflið hékk í slitnuðu með þeim afleiðingum að það lenti á manni sem studdi við það.
Mbl.is greindi frá því að þyrla Landhelgisgæslunnar hefði verið kölluð út á laugardagskvöld til þess að flytja manninn á spítala. Var hann með opið lærbrot en er ekki í lífshættu.