Umhverfismati vegna Kárahnúkjavirkjunar lokið óháð samningum við Reyðarál

Friðrik Sophusson forstjóri Landsvirkjunar segir að Landsvirkjun muni ljúka umhverfismatsferli vegna Kárahnjúkavirkjunar þrótt sú ólíklega staða kæmi upp að slitnaði upp úr samningaviðræðum við Reyðarál á næstu vikum. Landsvirkjun telji einnig nauðsynlegt að ljúka umhverfismatsferlinu, m.a. vegna þess að Kárahnjúkavirkjun, ef af henni verði, sé svo stór hluti af af heildarvatnsorku landsins.

Þetta kemur fram í ýtarlegu viðtali við Friðrik á Kárahnjúkavirkjanasíðu Landsvirkjunar á Netinu þar sem hann segir einnig að viðræður Landsvirkjunar og Reyðaráls, um orkuviðskipti og fleira, til undirbúnings stóriðjuframkvæmdum á Austurlandi, gangi eðlilega fyrir sig. Ekkert óvænt hafi komið þar upp sem gæti orðið hindrun á leið að settu marki og undirbúningsvinna Landsvirkjunar vegna virkjunar eystra gangi líka samkvæmt áætlun. Friðrik er í viðtalinu spurður hvort óskir Norðuráls um stækkun álvers í Hvalfirði setji á einhvern hátt strik í reikninginn varðandi undirbúning Kárahnjúkavirkjunar og breyta viðhorfum Landsvirkjunar til virkjunarframkvæmda á Austurlandi. Friðrik svarar þessu neitandi og segir fyrirtækið ræða áfram við Reyðarál og einnig við Norðurál, enda sé það fyrirtæki viðskiptavinur Landsvirkjunar nú þegar og á Landsvirkjun hvíli lögbundin skylda til að útvega Norðuráli meiri orku ef fyrirtækið ráðist í að stækka álverið á Grundartanga og samningar um orkuverð náist.Heimasíða Kárahnjúkavirkjunar