Heilbrigðisstarfsfólki Emirati-spítalans í borginni Rafah á Gasaströndinni tókst að bjarga lífi barns með keisaraskurði, eftir að móðir barnsins hlaut banvæna áverka af loftárásum Ísraelshers.
Móðirin var komin sjö og hálfan mánuð á leið með barnið.
BBC greinir frá.
Loftárásir Ísraelshers hæfðu heimili al-Sakani fjölskyldunnar þann 20. apríl með þeim afleiðingum að móðir barnsins, Sabreen, hlaut banvæna áverka.
Eiginmaður hennar og þriggja ára dóttir þeirra létu lífið í árásinni.
Þó ekki hafi tekist að bjarga lífi móðurinnar tókst læknum að halda lífi í barninu sem fæddist þó með mikla öndunarerfiðleika.
Læknar merktu barnið með límmiða þar sem þeir skrifuðu „barn píslarvottsins Sabreen al-Sakani“ áður en þeir lögðu það í hitakassa.
Yfirmaður á fæðingardeild Emirati-spítalans, Mohammed Salama, segir barnið á batavegi en þó enn í lífshættu. Hann gerir ráð fyrir því að barnið verði á spítalanum í mánuð til viðbótar.
Fjölskyldan hefur ákveðið að nefna barnið í höfuðið á Sabreen og föðuramma barnsins hefur heitið því að hugsa um það.