Svandís Svavarsdóttir, matvælaráðherra, hefur ákveðið að veita fjármagni til að kortleggja eignatengsl í sjávarútvegi. Talsvert er í að þar til gerð skýrsla verði tilbúin en henni á að skila fyrir lok næsta árs, að því er fram kemur í tilkynningu á vef Stjórnarráðsins.

Þar segir að eftirlitsstofnanir, sem hafa það hlutverk að fylgjast með stjórnunar- og eignatengslum í íslensku atvinnulífi, hafi að eigin frumkvæði áformað að efla samstarf sín á milli með það að markmiði að skapa betri yfirsýn yfir stjórnunar- og eignatengsl, nýta betur þekkingu á því sviði og styrkja greiningu og nauðsynleg úrræði.

„Matvælaráðuneytið hefur gert samning við Samkeppniseftirlitið um að tryggja fjárhagslegt svigrúm til að stofnunin geti ráðist í athugun á stjórnunar- og eignatengslum í sjávarútvegi. Samhliða er stefnt að auknu samstarfi stofnana á þessu sviði, þ.e. Samkeppniseftirlitsins, Fiskistofu, Skattsins og Seðlabanka Íslands,“ segir í tilkynningunni.

Þar segir að þessari athugun sé fyrst og fremst ætlað að „auka gagnsæi og bæta stjórnsýslu á sviði eftirlits með stjórnunar- og eignatengslum í sjávarútvegi.“ En stefnt er að því að afla upplýsingar og kortleggja eignatengsl sjávarútvegsfyrirtækja sem hafa fengið úthlutað „ákveðnu umfangi aflaheimilda og áhrifavaldi eigenda sjávarútvegsfyrirtækja í gegnum beitingu atkvæðisréttar og stjórnarsetu í fyrirtækjum.“

Kortlagning eignatengslanna verður tekin saman í skýrslu sem afhent verður matvælaráðuneytinu eigi síðar en 31. desember 2023 og á þannig að nýtast ráðuneytinu í stefnumótunarvinnu um sjávarútveginn.

„Skýrslan mun ekki fjalla um ákvarðanir Samkeppniseftirlitsins eða annarra eftirlitsstofnana um frekari athuganir eða íhlutun á grundvelli starfsheimilda eða starfsskyldna samkvæmt hlutaðeigandi lögum. Hún mun hins vegar nýtast Samkeppniseftirlitinu, Fiskistofu, Skattinum og Seðlabanka Íslands við þekkingaruppbyggingu og við beitingu lagafyrirmæla á viðkomandi sviði. Við vinnslu skýrslunnar er stefnt að því að mótuð verði upplýsingatækniumgjörð sem nýtist við frekari kortlagningu og eftirlit með stjórnunar- og eignatengslum í íslensku atvinnulífi almennt,“ segir í tilkynningunni.

Þá segir að kortlagningin og tilheyrandi skýrslugerð sé hluti af verkefninu „Auðlindin okkar“ er snýr að stefnumótun í sjávarútvegi og endurskoðun á fiskveiðilöggjöfinni.

Frétt af mbl.is

Ný sjávarútvegsstefna fyrir opnum dyrum

Tengdar fréttir

Fiskveiðistjórnunin

Kristrún vill frekar gjöld en kerfisbreytingar

• Fáar vísbendingar um bættar strandveiðar
• Velgengnin byggð á góðri umgjörð
• Brimi úthlutað mestum kvóta
• Mun ekki víkja frá ráðgjöf vísindamanna

» Fleiri tengdar fréttir

Auðlindin okkar

Telja frumvarp ógna lífskjörum og atvinnufrelsi

• Frumvarpið veiki sjávarútveginn
• Frestur til umsagnar framlengdur í annað sinn
• Fá merki um að sátt náist
• Telja ákvæði sjávarútvegsfrumvarpsins óljós

» Fleiri tengdar fréttir

Kortlagning eignatengsla

Segja gögnin nú tilheyra opinberum skjalasöfnum

• SKE skilar ekki gögnunum og dregur svör til G. Run
• Persónuvernd ekki með í ráðum við athugun SKE
• Óttast ekki hefnd SKE
• Ógnarstjórn og einelti SKE

» Fleiri tengdar fréttir

• Blogga um frétt