Fer fram á algjöra fríverslun við ESB

„Það sem við erum að fara fram á er að fá algjöra fríverslun fyrir fisk inn á EES-svæðið. Það sem ég hef lagt áherslu á er að við fáum ekki lakari markaðsaðgang fyrir fisk og sjávarafurðir en önnur samstarfsríki sem Evrópusambandið á ekki í næstum eins nánu samstarfi við,“ segir Guðlagur Þór Þórðarson utanríkis- og þróunarsamvinnuráðherra í samtali við 200 mílur um ferð sína til Brussel í síðustu viku þar sem fundað var með æðstu stjórnendum.

Frétt af mbl.is

Sóst eftir auknum tollfrjálsum viðskiptum

Fundað í Brussel

Greint hefur verið frá því á 200 mílum á mbl.is að Guðlaugur Þór hefði fundað með framkvæmdastjórum Evrópusambandsins um aukin tollfrjáls viðskipti þar sem verslun með sjávarafurðir var í brennidepli.

Fundaði Guðlaugur Þór með Josep Borrell, utanríkismálastjóra ESB, Valdis Dombrovskis, viðskiptamálastjóra ESB, Virginijus Sinkevièius, framkvæmdastjóra sjávarútvegsmála ESB, og Janusz Wojciechowski, framkvæmdastjóra landbúnaðarmála ESB.

Guðlaugur Þór Þórðarson utanríkis- og þróunarsamvinnuráðherra og Valdis Dombrovskis, viðskiptamálastjóri ESB. Ljósmynd/Stjórnarráðið

Tilbúnir í viðræður

Guðlaugur Þór segir fulltrúa Evrópusambandsins tilbúna í viðræður.

„Það sem kom fram á fundinum er að Evrópusambandið er reiðubúið að hefja samræður við okkur um fríverslun með fisk og aðrar sjávarafurðir. Sömuleiðis er skýrt af okkar hálfu að jafnvægi þarf að nást í verslun með landbúnaðarafurðir,“ segir Guðlaugur Þór og útskýrir að bæði þrufi að líta til þess að helsta útflutningsland íslensks lambakjöts sé Bretland sem ekki er lengur í Evrópusambandinu sem og að samingar um útflutning á skyri hafi ekki gengið eftir.

„Ísland vinnur náið með ESB og aðildarríkjum þess á grundvelli EES-samningsins og okkar sameiginlegu gilda og það hlýtur að vera okkur öllum í hag að sanngirni ríki í viðskiptum okkar í milli,“ er haft eftir ráðherranum á vef Stjórnarráðsins.

Guðlaugur Þór og Virginijus Sinkevičius framkvæmdastjóri sjávarútvegsmála ESB. Ljósmynd/Stjórnarráðið

75-80% tollfrelsi

Aðspurður hversu mikla breytingu frá núverandi markaðsaðgangi fríverslun myndi hafa í för með sér segir Guðlaugur Þór að um sjötíu og fimm eða áttatíu prósent af útfluttum sjávarafurðum á Evrópumarkað séu nú þegar tollfrjáls, sem sé góður aðgangur. Fríverslun myndi færa okkur algjörlega tollfrjálsa verslun.

Í skrifum sínum á samfélagsmiðla um fundina segir Guðlaugur Þór:

„Það er mikilvægt að fylgja vel eftir og gæta stöðugt hagsmuna okkar í EES-samstarfinu. Það gerir það enda enginn fyrir okkur!“