Nergård veðjar á þorskeldi

Norska útgerðarfélagið Nergård hefur ákveðið að festa kaup á 15% hlut í norska fiskeldisfyrirtækinu KIME Akva sem sérhæfir sig í eldi á þorski.

„Þetta styrkir stöðu okkar innan sjávarfangsgeirans og opnar á ný tækifæri í sjálfbæru þorskeldi. Við hlökkum til að knýja áfram nýsköpun og þróa markaðinn fyrir hvítfisk enn frekar í samstarfi með KIME Akva,“ segir í tilkynningu Nergård.

Fullyrt er í umfjöllun Intrafish að samverkandi þættir eins og samdráttur í þorskkvóta og aukning kostnaðarliða hafi hvatt Nergård til að fjárfesta í þorskeldinu.

Fjárfesting Nergård á sér stað sem hluti af hlutafjáraukningu KIME Akva sem hefur með henni aflað 52 milljónum norskra króna, jafnvirði 668 milljóna íslenskra króna. Auk Nergård hefur útgerðin Oddvar Nes AS einnig fjárfest í eldisfyrirtækinu.

Í tilkynningu fiskeldirsfyrirtækisins segir að fjármagnið mun nýtast í frekari fjárfestingar, meðal annars í virðiskeðju þess.

Tengist Öldu Seafood

Nergård er meðal stærstu útgerðum Noregs en Alda Seafood fer með 39,9% hlut í félaginu. Alda Seafood var áður hluti af erlendri starfsemi Samherja en Baldvin Þorsteinsson festi kaup á erlenda starfsemi Samherja Holding 2022.

Baldvin situr í stjórn Nergård.

Frétt af mbl.is

Baldvin kaupir erlenda starfsemi Samherja Holding

Alda Seafood fer nú með hlut í fleiri stórum evrópskum sjávarútvegsfyrirtækjum. Auk hinna tæpa 40% í Nergård fer Alda með alla hluti í Deutsche Fiscfang Union sem og 85% hlut í Icefresh Gmbh., 22,25% hlut í Compagnie des Pêches Saint-Malo , 50% í UK Fisheries, 90% hlut í Seagold, 50% í Atlantex, 50% í Arctic Navigations, 50% í Batterfisa SIA, 25% í Marlinas, 49% í Newfound Resources Ltd. og 86,53% hlut í PAOP.

• Blogga um frétt