Bandaríski álrisinn Alcoa skýrði frá því í dag, að það myndi segja upp 4.250 starfsmönnum í bílaíhlutaverksmiðjum sínum, Alcoa Fujikura Ltd (AFL), í Ciudad Acuna og Torreon í Mexíkó.
Alcoa, stærsti álframleiðandi heims, sagði fyrr á árinu að gripið yrði til endurskipulagningar verksmiðjunnar til að viðhalda samkeppnisfærni sinni á markaði fyrir framleiðslu lítilla og stórra bifreiða í Norður-Ameríku.
Verður 1.700 af 11.000 manna starfsliði í Ciudad Acuna sagt upp og 2.550 af 8.400 í Torreon. „Þessa erfiðu ákvörðun tökum við vegna markaðsaðstæðna. Samkeppni á sviði bílaframleiðslu í Norður-Ameríku er sérlega hörð og við þurfum að grípa til hennar til að halda velli í dag og um ókomna framtíð," segir Jose Alvarado, framkvæmdastjóri AFL.