Franska knattspyrnusambandið er afar ósátt með hegðun markvarðarins Emilíano Martínez í og eftir úrslitaleik Frakklands og Argentínu á HM í Katar.
Martínez var með mikla stæla í leiknum og þá sérstaklega í vítakeppninni. Eftir leikinn hagaði hann sér furðulega í verðlaunaafhendingunni og var duglegur að syngja niður til Kylians Mbappés, stjörnuleikmanns Frakka.
Þegar Argentínumenn fögnuðu með löndum sínum í heimalandinu, var Martínez með brúðu, með límdu andliti Mbappés.
„Ég skrifaði argentínska knattspyrnusambandinu, því þetta var of langt gengið og óíþróttamannslegt. Ég á erfitt með að skilja þetta,“ sagði Noel Le Graet, forseti franska knattspyrnusambandsins, í samtali við Lemonde í heimalandinu.