Heimsmeistarar Argentínu lentu í Buenos Aires snemma í morgun. Það er óhætt að segja að þeir hafi fengið góðar móttökur hjá fólkinu sínu.
Argentína hafði betur gegn Frakklandi á sunnudag í úrslitaleik heimsmeistaramótsins í Katar, úrslitaleik sem lengi verður minnst sem eins allra eftirminnilegasta og besta úrslitaleiks í sögu mótsins.
Argentína komst í 2:0 í fyrri hálfleik með mörkum frá Lionel Messi og Angel Di Maria áður en Kylian Mbappé jafnaði metin á rúmri mínútu undir lok venjulegs leiktíma. Messi kom Argentínu yfir í seinni hálfleik framlengingar en Mbappé jafnaði skömmu áður en Marciniak dómari flautaði af. Argentína hafði betur í vítaspyrnukeppninni, 4:2.
Þetta er þriðji heimsmeistaratitill Argentínu. Fyrsti titillinn kom árið 1978 á heimavelli og svo árið 1986 í Mexíkó þegar Diego Armando Maradona vann keppnina nærri einn síns liðs og svo nú árið 2022 í Katar, á móti sem verður trúlega alltaf minnst sem heimsmeistaramóts Lionels Messi. Þetta var fyrsta heimsmeistaramótið sem haldið var eftir að Maradona féll frá árið 2020.
Hundruðir þúsunda landsmanna streymdu út á götur Buenos Aires til að hylla HM-hetjurnar sem keyrðu í opinni rútu áleiðis til æfingasvæðis argentínska knattspyrnusambandsins áður en aðalhátíðahöldin fara fram seinna í dag nærri hinu gríðarstóra Obelisco-minnismerki í miðri Buenos Aires.