Slóveninn Marko Bezjak hefur verið úrskurðaður í eins árs bann af króatíska handknattleikssambandinu.
Fær hann refsinguna fyrir að missa stjórn á skapi sínu og ráðast á eftirlitsdómara í leik síns liðs RK Nexe gegn Zagreb þann 7. apríl.
Allt sauð upp úr í viðureign liðanna, sem þá voru efstu tvö lið króatísku úrvalsdeildarinnar. Bezjak missti stjórn á sér og réðst að eftirlitsdómaranum Ante Josic er hann gekk af leikvellinum.
Þáverandi þjálfari liðsins Veselin Vujovic var einnig úrskurðaður í þriggja mánaða bann og rekinn frá félaginu. Þá var Andraz Velkavrh, samherji Bezjak, úrskurðaður í fjögurra leikja bann.
Bezjak var hjá þýska liðinu Magdeburg í tíu ár og lék hann með Ómari Inga Magnússyni og Gísla Þorgeiri Kristjánssyni.