Eiður Aron Sigurbjörnsson, varnarmaðurinn reyndi hjá Vestra, er ristarbrotinn og verður ekki með liðinu í Bestu deildinni í fótbolta næstu þrjá mánuðina eða svo.
Vestramenn tilkynntu þetta í dag en Eiður þurfti að fara af velli eftir að brotið var á honum í leik Vestra og HK í Bestu deild karla í Laugardalnum í gær.
Þeir gera ráð fyrir tólf vikna fjarveru, eða framyfir miðjan júlí, en til þess tíma eiga nýliðarnir fyrir höndum tíu leiki í Bestu deildinni auk þess sem þeir mæta KA í sextán liða úrslitum bikarkeppninnar.
Eiður kom til Vestra frá ÍBV fyrir þetta tímabil og er reyndasti leikmaður liðsins með 206 leiki að baki í efstu deild hér á landi, með ÍBV, Val og Vestra, auk þess sem hann lék um skeið sem atvinnumaður í Svíþjóð, Noregi og Þýskalandi.