Það var vor í lofti þegar Árvakur, útgáfufélag Morgunblaðsins og mbl.is, hélt árshátíð í Sjálfsstæðissalnum á Iceland Parliament hótelinu. Boðið var upp á glæsilegan þriggja rétta matseðil og dýrindis vín. 

Ásgeir Páll Ágústsson, útvarpsstjarna á K100 og söngvari, sá um að veislustjórn þetta kvöld en hann reitti af sér brandarana. Ásthildur Hannesdóttir verkefnastjóri hjá Árvakri var ræðumaður kvöldsins og kitlaði hláturtaugar samstarfsfólks síns. Þá steig Bolli Már Bjarnason uppistandari og útvarpsstjarna á K100 á stokk og sagði nokkra brandara. 

Patrik Snær Atlason, Pretty­boitjok­ko, kom og skemmti gestunum og fékk alla til þess að dansa frá sér allt vit og syngja sig hása. Sumir fóru meira að segja upp á svið og dönsuðu og sungu með tónlistarmanninum. 

„Haltu áfram að skína,“ sungu gestirnir af öllu hjarta. 

Þegar allir voru orðnir heitir og hásir kom Friðrik Dór, litli bróðir Jóns Jónssonar, og skemmti gestum. 

Dansað var fram yfir miðnætti en þá tíndust þeir allra hörðustu yfir á skemmtistaðina í nágrenninu og héldu gleðinni áfram.