Ljúffengt meðlæti fyrir hátíðina

Sveppir fylltir með lauksultu

• 4 stk. meðalstórir sveppir
• smjör
• balsamikedik
• salt
• pipar

Aðferð:

1. Takið miðjustilkinn af sveppnum.
2. Troðið smjörklumpi í miðjuna á sveppnum og kryddið hann með salti og pipar.
3. Setjið 3-4 dropa af balsamikediki í hvern svepp.
4. Bakið í ofni á 160 gráðum í fimm mínútur, snúið við og bætið við öðrum fimm mínútum.
5. Takið sveppina út og fyllið með lauksultunni.

Lauksulta

• 2 stk. gulir laukar
• 1 tsk. hunang
• 10 g smjör
• 5 g edik

Aðferð:

1. Skerið laukinn í þunnar sneiðar og setjið í pott og kveikið undir á meðalháum hita.
2. Þegar laukurinn er byrjaður að brúnast smá er smjöri bætt við ásamt ediki.
3. Leyfið lauknum að eldast alveg í gegn, þá er hunangi bætt við og eldað þangað til að sulta er byrjuð að myndast.
4. Fyllið sveppinn með lauksultunni.

Hasselback-kartöflur

• 4 bökunarkartöflur
• 100 g smjör
• salt
• rósmarín

Aðferð:

1. Smjör er sett í pott og brætt með rósmaríni út í.
2. Skorið er djúpt í kartöflurnar með stuttu millibili, passa skal að fara ekki í gegnum þær. 
3. Kartöflunum er raðað í eldfast mót og smjöri hellt yfir.
4. Kartöflurnar eru bakaðar á 180 gráðum í 50 mínútur. 
5. Gott er að ausa smjörinu yfir þær með reglulegu millibili til að fá þær gullinbrúnar.