Lisa Boije Af Gennäs er líklega ein fróðasta kona landsins um kjöt. Hún og eiginmaður hennar Þórarinn Jónsson reka verslunina Matarbúrið úti á Granda en þau eru nautakjötsframleiðendur  og rækta nautgripi á Hálsi í Kjós. Matarbúrið selur því aðeins afurðir beint frá bónda. 

Eggert Jóhannesson

„Við erum fyrst og fremst nautakjötsframleiðendur, við rekum litla smávöruverslun úti á Granda og kaupum af öðrum smáframleiðendum það sem við ekki getum framleitt. Vegna smæðar okkar og okkar samstarfsaðila er ekki alltaf allt til, kjöt er í okkar huga náttúruafurð og við viljum nýta allt af skepnunni. Til þess að það gangi upp er mikilvægt að viðskiptavinir okkar séu tilbúnir að prófa hina ýmsu bita ekki bara þá bita sem flestir þekkja,“ segir Lisa en í heimalandi hennar er kjötið nýtt á mun fjölbreyttari máta.

Lisa deilir með okkur einum af sínum uppáhaldsréttum –  saltimbocca (ítalska: hoppa inn í munninn) með risotto milanese. „Þetta er góður matur á aðventunni, ekki of dýr, en ótrúlega fallegur fyrir augun og hefur með sér andblæ frá Miðjarðarhafinu sem er gott á köldum og dimmum vetri.“

Eggert Jóhannesson