Endurgerð á kvikmyndinni The Blair Witch Project er í bígerð. Kvikmyndafyrirtækin Lionsgate og Blumhouse hafa tekið höndum saman um að endurgera bandarísku hrollvekjuna sem hræddi líftóruna úr mörgum sem sáu hana á sínum tíma, en 25 ár eru liðin frá útgáfu hennar. Tilkynnt var um kvikmyndaverkefnið á ráðstefnu CinemaCon á miðvikudag.
The Blair Witch Project segir af ungu fólki sem hverfur við dularfullar aðstæður í skóglendi en ári síðar finnast myndbandsupptökur sem það gerði um ferðalag sitt.
Hrollvekjan vakti mikla lukku um allan heim og bíógestir biðu í röðum til að sjá hana. The Blair Witch Project er ein af gróðamestu kvikmyndum sem gerðar hafa verið miðað út frá framleiðslu- og kynningarkostnaði.
Ekki hefur verið ákveðið hverjir fari með helstu hlutverk í myndinni né hver mun leikstýra henni.