Middleton giftir sig í lítilli sveitakirkju

Litla systir Katrínar hertogaynju, Pippa Middleton, hefur valið töluvert íburðarminni kirkju til að gifta sig í en stóra systir hennar gerði. En Katrín og Vilhjálmur giftu sig eftirminnilega í Westminster Abbey árið 2011. 

Samkvæmt Mirror hafa Pippa Middleton og bankamaðurinn James Matthews valið sér litla og sæta sveitakirkju frá 12. öld stutt frá bænum sem Middleton-systkinin voru alin upp í til þess að gifta sig í 20. maí. Kirkjan er staðsett á einkalóð og gefst almenningi því ekki kostur á að gerast boðflennur í brúðkaupsathöfninni. 

Eins og sjá má á myndunum sem fylgja fréttinni er kirkjan ekki stór og því er líklegt að kirkjubekkirnir verði þéttsetnir en búist er við um 150 gestum.