Arnarlax fær leyfi fyrir seiðastöð við Tálknafjörð
Setja bókamerki
/frimg/1/43/69/1436988.jpg)
Matvælastofnun hefur veitt Arnarlax ehf. rekstrarleyfi til fiskeldis á landi að Gileyri við Tálknafjörð. Um er að ræða nýtt rekstrarleyfi fyrir 1.000 tonna hámarkslífmassa vegna seiðaeldis á laxi og bleikju sem síðar verða sett út í sjókvíar félagsins til áframeldis.
Fram kemur í tilkynningu á vef Matvælastofnunar að Arnarlax hf. sótti um nýtt rekstrarleyfi í júní 2022. Er vakin athygli á að starfsemin er einnig háð starfsleyfi Umhverfisstofnunar.
Tillaga Matvælastofnunar um að rekstrarleyfi var auglýst á vef stofnunarinnar þann 8. nóvember 2023. Við auglýsingu tillögu að nýju rekstrarleyfi var tilkynnt um að frestur til að skila inn athugasemdum var 6. desember 2023, en engin athugasemd barst vegna tillögunnar.
Lítil hætta talin á sleppingum
Óskað var eftir umsögnum frá Fiskistofu, Hafrannsóknastofnun og Tálknafjarðarhrepp þann 14. nóvember 2022. Hvorki Tálknafjarðarhreppur né Hafrannsóknastofnun skilaði umsögn vegna málsins.
Í umsögn Fiskistofu frá 24. febrúar kemur fram að stofnunin telur að þar sem um landeldi sé að ræða sé ekki mikil hætta á að smit berist í villta stofna og hægt sé að bregðast við ef sjúkdómar koma upp í eldisstöðinni og varna því að smit berist frá stöðinni. Fiskistofa bendir á að mikilvægt sé að huga sérstaklega að því að affall frá stöðinni sé þannig útbúið að fiskar sleppi ekki úr stöðinni.
„Matvælastofnun bendir á að í rekstrarleyfum fiskeldisstöðva á landi er skilyrði að stöð sé útbúin búnaði sem kemur í veg fyrir að fiskur sleppi úr eldiskari og búnaði staðsettum í frárennsli stöðvar sem fangar fisk sem sleppur. Búnaður eldisstöðvarinnar er þannig að í öllum körum eru ristar til að hindra að fiskur geti strokið og einnig eru ristar í brunnum sem dauðfiskur safnast í. Óverulegar líkur eru taldar á stroki úr stöðinni þegar tillit er tekið til varnarbúnaðar í körum og í frárennsli stöðvarinnar,“ segir í greinargerð Matvælastofnunar.
Hollandi vísað úr Eurovision
Mikilvægt að skoða af hverju þær velja þessa leið
Jaðarsetning það versta
Allar líkur á að Seðlabankinn lækki næst vexti
Kynnir nýja stefnu í málefnum landamæra í sumar
Tók barn upp úr innkaupakerru móður
Rampur númer 1.100 vígður í dag