Staða innlána Auðar, fjármálaþjónustu Kviku, hefur náð yfir 100 milljörðum króna. Viðskiptavinir eru nú um 45 þúsund.
Þetta segir Hilmar Kristinsson, vörustjóri Auðar, í samtali við Morgunblaðið. Auður, sem býður upp á bundna og óbundna sparnaðarreikninga á hagstæðum vöxtum, er fimm ára í dag en hún tók á móti fyrstu innlánum þann 12. mars 2019. Þjónustan naut strax vinsælda, en haustið 2019 námu innlán hjá Auði þá þegar tæpum 14 milljörðum króna. Í viðtali við þáverandi forstjóra Kviku í lok ágúst 2022 kom fram að innlán hjá Auði næmu þá um 50 milljörðum króna. Þau hafa því tvöfaldast síðan þá.
Hilmar rifjar upp að þegar Auður kom fyrst á markað hafi markmiðið verið að bjóða upp á hærri vexti á óbundnum sparnaðarreikningum en aðrir. Þá voru vextir 4%. Aðrir bankar fylgdu í kjölfarið og hófu að hækka sína vexti á innlánsreikningum.
„Auður hreyfði við markaðnum og hefur frá upphafi aukið samkeppni á innlánamarkaði, til hagsbóta fyrir heimilin í landinu,“ segir Hilmar og bætir við að Auður bjóði enn upp á hæstu vexti á óbundnum reikningum.
„Það má áætla að Auður hafi, bæði með sinni þjónustu og öflugri samkeppni frá hinum bönkunum, fært heimilum landsins tugi milljarða í auknar vaxtatekjur,“ segir hann.
Þjónustan hefur þróast á þeim tíma sem liðinn er frá því að Auður hóf starfsemi. Nú er einnig boðið upp á bundna innlánsreikninga sem bera enn hærri vexti og í fyrra hóf Auður að bjóða upp á græna framtíðarreikninga fyrir börn og unglinga.
Hilmar segir að vöruframboð Auðar sé í stöðugri þróun og það muni ekki fara fram hjá neinum þegar nýjungar bætast við.