Aldís Ásta Heimisdóttir fór mikinn í liði Skara þegar liðið hafði betur gegn Höör, 25:20, í oddaleik liðanna í átta liða úrslitum sænska kvennahandboltans á útivelli í kvöld.
Skara vann einvígið 3:2 og er komið áfram í undanúrslit.
Aldís Ásta var markahæst í leiknum með sjö mörk fyrir Skara.
Þá bætti Jóhanna Margrét Sigurðardóttir við tveimur mörkum fyrir Íslendingaliðið.
Berta Rut Harðardóttir og liðsfélagar hennar í Kristianstad máttu sætta sig við tap, 26:30, fyrir Önnered í fjórða leik liðanna í átta liða úrslitum og er þar með úr leik.
Önnered vann einvígið 3:1 og er komið í undanúrslit.
Berta Rut komst ekki á blað hjá Kristianstad að þessu sinni.