Enska knattspyrnufélagið Everton hefur áfrýjað úrskurðinum um að draga tvö stig til viðbótar af liðinu í ensku úrvalsdeildinni, en það var gert síðasta mánudag.
BBC Radio Merseyside skýrði frá þessu núna um hádegið.
Samtals hafa því verið dregin átta stig af Everton á þessu tímabili, fyrir að brjóta reglur deildarinnar um fjárhagslega háttvísi. Það þýðir að liðið er í erfiðri fallbaráttu og situr nú í sextánda sæti af tuttugu liðum deildarinnar, tveimur stigum fyrir ofan fallsæti.