Vincent Kompany, knattspyrnustjóri Burnley, er kominn í tveggja leikja bann í ensku úrvalsdeildinni.
Kompany fékk rauða spjaldið og var rekinn upp í stúku síðasta laugardag þegar lið hans tapaði 1:0 fyrir Everton í fallbaráttuleik liðanna á Goodison Park í Liverpool.
Hann verður því að sitja uppi í áhorfendastúku í næstu tveimur leikjum liðsins, sem eru heimaleikur gegn Brighton á laugardaginn kemur og útileikur gegn Sheffield United laugardaginn 20. apríl.
Þá var Kompany sektaður um tíu þúsund pund vegna brottrekstursins.
Burnley er í erfiðri stöðu í næstneðsta sæti deildarinnar, sex stigum frá því að komast úr fallsæti þegar sex umferðum er ólokið, og verður helst að vinna báða þessa leiki til að eiga raunhæfa möguleika á að bjarga sér frá falli.