Enska úrvalsdeildin í knattspyrnu karla hefur dregið fjögur stig af Nottingham Forest fyrir brot gegn reglum deildarinnar um hagnað og sjálfbærni í rekstri.
The Athletic greinir frá.
Stigafrádrátturinn þýðir að Forest fer úr 17. sæti niður í það 18., sem er fallsæti og er nú með 21 stig eftir 29 leiki í stað 25 stiga.
Í janúar síðastliðnum fór Forest fyrir óháða nefnd vegna gruns um brot félagins gegn reglunum.
Brotin lúta að því að Forest tapaði hærri fjárhæðum en leyfilegt er tímabilið 2022-23.
Forest hefur ekki tekið ákvörðun um hvort félagið áfrýi niðurstöðunni. Ákveði félagið að gera það verður nefndin að taka áfrýjunina fyrir og komast að niðurstöðu fyrir 15. apríl.