Bournemouth vann í gærkvöldi ótrúlegan endurkomusigur á Luton Town, 4:3, í ensku úrvalsdeildinni í knattspyrnu karla.
Bournemouth var 0:3 undir í leikhléi en sneri taflinu við í síðari hálfleik með magnaðri endurkomu.
Í rúmlega þriggja áratuga sögu úrvalsdeildarinnar er það afar sjaldgæft að lið sem eru þremur mörkum undir í hálfleik vinni leikinn.
Raunar var þetta einungis í þriðja skipti sem það gerist. Það gerðist síðast í október árið 2003 þegar Wolverhampton Wanderers vann 4:3-sigur á Leicester City eftir að síðarnefnda liðið hafði verið 0:3 yfir í leikhléi.
Þar á undan hafði Manchester United orðið fyrst liða í úrvalsdeildinni til að afreka þetta í september árið 2001. Liðið var þá 0:3 undir í hálfleik gegn Tottenham Hotspur á White Hart Lane.
Rauðu djöflarnir skoruðu hins vegar fimm mörk í síðari hálfleik og unnu glæsilegan 5:3-sigur.