Ummæli Josés Mourinhos, knattspyrnustjóra Manchester United, um Armenann Henrikh Mkhitaryan á blaðamannafundi í dag fyrir leik liðsins gegn West Bromwich á sunnudag renna enn frekari stoðum undir mögulega brottför kappans frá félaginu en hann hefur aðeins einu sinni í síðustu átta leikjum verið í 18 manna leikmannahópi Manchester United.
Mourinho hefur áður látið hafa það eftir sér að aðrir leikmenn eigi einfaldlega meira skilið en Mkhitaryan að vera í liðinu.
„Hver einasti leikmaður er falur fyrir rétt verð,“ sagði Mourinho svo í dag.
„Ef leikmaður er ekki ánægður og rétt tala er boðin í hann að okkar mati, sem gerðist með Memphis (Depay) og Morgan (Schneiderlin), þá myndi ég aldrei segja nei,“ sagði Mourinho um Mkhitaryan.
Spurður út í möguleg kaup United í janúar sagðist Mourinho ekki vera mikill aðdáandi þess. „En stundum koma upp aðstæður þar sem þú færð tækifæri sem þú mátt ekki missa af,“ sagði Mourinho.