Jóhann Berg Guðmundsson er í leikmannahópi Burnley sem mætir Manchester United í ensku úrvalsdeildinni í knattspyrnu karla á Turf Moor klukkan 13.15 í dag. Þetta er í fyrsta skipti sem hann er í leikmannahópi Burnley síðan hann meiddist á hné í bikarleik um miðjan febrúar.
Meiðsli hafa gert Jóhanni erfitt fyrir á leiktíðinni, en hann tognaði í læri undir lok nóvember og aftur í janúar. Hann hefur komið við sögu í 16 af 32 deildarleikjum Burnley í vetur, en liðið er í 15. sæti deildarinnar og er fimm stigum frá fallsæti.