Of opinn og alls ekki góður

„Leikurinn var allt of opinn og alls ekki nógu góður hjá okkur. Það sem við lögðum upp með gekk ekki upp,“ sagði Selma Dögg Björgvinsdóttir fyrirliði Víkings í samtali við mbl.is í kvöld.

Víkingur mátti þola stórt tap, 7:2, gegn Íslandsmeisturum Vals í 3. umferð Bestu deildarinnar á Hlíðarenda í kvöld. Staðan í hálfleik var 2:1 fyrir Val, þar sem annað markið kom í lok hálfleiksins.

„Við náðum að halda þessu í leik en svo fór þetta eins það fór í seinni hálfleik. Þetta tapaðist í seinni hálfleik. Við ætluðum að vinna þennan seinni hálfleik en þetta féll ekki með okkur í dag.

Þær skora eiginlega helminginn af mörkunum úr föstum leikatriðum. Það er ekki boðlegt, þótt það sé það sem þær eru búnar að vera sterkar í síðustu ár. Svo opnaði þetta víti í lok fyrri leikinn.“

Bakvörðurinn Emma Steinsen Jónsdóttir var í marki Víkings síðasta kortérið eða svo vegna meiðsla Kötlu Sveinbjörnsdóttur. Valur nýtti sér það og bætti við mörkum í lokin. „Það munar öllu að vera ekki með varamarkvörð á móti svona sterku liði.“

Selma skoraði sitt fyrsta mark í efstu deild í kvöld en það huggar hana lítið þegar hún fer á koddann í kvöld. „Eiginlega ekki, 7:1 eða 7:2 skiptir ekki miklu. Það er samt ágætt að vera komin á blað en það skiptir litlu í stóra samhenginu,“ sagði Selma.  

• Blogga um frétt