Sumarið er um það bil að ná hámarki um þessar mundir og því um að gera að varpa ljósi á þær áherslur sem tískuhúsin hafa lagt upp með í ár. Rómantíkin er allsráðandi. Mikið er um milda liti, blúndur, gegnsæ efni og blómamynstur.
Léttir sumarkjólar eru málið í sumar. Tískumerkið Chloé lagði línurnar með því að hanna létta, síða sumarkjóla í rómantískum mynstrum. Þá eru pífur og púffermar einnig áberandi sem og létt gegnsæ efni eins og organza og siffon.
Víða má sjá afturhvarf til hlutlausari lita. Fölbleikur, grár eða ljósblár er vinsæll í sumar eins og sést í sumartísku Dior, Salvatore Ferragamo og Fendi. Þá er Victoria Beckham að vinna með ýmis afbrigði af ljósbrúnum og gulum tónum.
Hvers konar skraut í kringum hálsinn er heitt í sumar. Hvort sem það eru slaufur, blóm, stór hálsmen eða slæður.